രാജീവ് രവിയും ദുല്‍ഖര്‍ സല്‍മാനും ഒന്നിക്കുന്ന ചിത്രത്തിന് പേരിട്ടു. കമ്മാട്ടിപ്പാടം എന്ന പേരില്‍ എത്തുന്ന ചിത്രം ഒരു ആക്ഷന്‍ ത്രില്ലറായിരിക്കുമെന്നും സൂചനകളുണ്ട്. നേരത്തെ കലിപ്പ് എന്നാണ് ചിത്രത്തിന്റെ പേരെന്ന് റിപ്പോര്‍ട്ടുകളുണ്ടായിരുന്നു. മുംബൈയിലും കൊച്ചിയിലുമായി ചിത്രീകരണം പുരോഗമിക്കുന്ന ചിത്രത്തിന്റെ തിരക്കഥ പി ബാലചന്ദ്രനാണ്. തനിക്ക് ഇഷ്ടമുള്ള പ്രമേയങ്ങള്‍ വിട്ടുവീഴ്ചകളില്ലാതെ ചിത്രീകരിക്കുന്ന വേറിട്ട വഴിയാണ് അന്നയും റസൂലിലും സ്റ്റീവ് ലോപസിലുമെല്ലാം രാജീവ് രവി സ്വീകരിച്ചത്. ആരാധകരുടെ ഏറ്റവും പ്രിയപ്പെട്ട കുഞ്ഞിക്കയുമായി അദ്ദേഹം ചേരുമ്പോള്‍ മാസും ക്ലാസും ഒത്തിണങ്ങിയ ഒരു പടമാണ് പ്രതീക്ഷിക്കപ്പെടുന്നത്. അധോലോക പശ്ചാത്തലത്തിലുള്ള ഒരു ചിത്രമാണ് ഒരുങ്ങുന്നതെന്നാണ് സൂചന.