സൂര്യ ചിത്രം ‘സൂരറൈപോട്ര്’ ഇന്ന് രാത്രി 10 മണിക്ക് ശേഷം ആമസോണ്‍ പ്രൈം പ്ലാറ്റ്ഫോമില്‍ എത്തുന്നു. വന്‍ മുതല്‍ മുടക്കില്‍ ഒരുക്കിയ ചിത്രം ഒക്‌റ്റോബര്‍ 30ന് ആമസോണ്‍ പ്രൈമില്‍ പ്രദര്‍ശിപ്പിച്ചു തുടങ്ങുമെന്നായിരുന്നു നേരത്തേയുള്ള അറിയിപ്പ്. എന്നാല്‍ ചില സാങ്കേതിക കാരണങ്ങളാല്‍ റിലീസ് നീട്ടുകയായിരുന്നു. ഇപ്പോൾ നവംബർ 12ന് ചിത്രം എത്തുമെന്നാണ് അണിയറ പ്രവർത്തകർ വ്യക്തമാക്കിയിട്ടുള്ളത്. ഇന്ന് 10 മണിയോടെ തന്നെ ചിത്രം പ്ലാറ്റ്ഫോമില്‍ പ്രദര്‍ശനത്തിന് ലഭ്യമാക്കുമെന്നാണ് വിവരം. കോവിഡ് 19 മൂലം തിയറ്ററുകള്‍ അടച്ചിട്ടതിനു ശേഷം തിയറ്റര്‍ റിലീസിന് കാക്കാതെ ഡിജിറ്റല്‍ പ്ലാറ്റ്‌ഫോമുകളില്‍ നേരിട്ടു റിലീസ് ചെയ്യുന്ന ചിത്രങ്ങളുടെ കൂട്ടത്തിലേക്ക് എത്തുന്ന തെന്നിന്ത്യയിലെ ഏറ്റവും വലിയ ചിത്രമാണ് സൂരറൈപോട്ര്.
സുധ കോംഗാര സംവിധാനം ചെയ്യുന്ന ഈ ചിത്രം എയര്‍ ഡെക്കാന്‍ സ്ഥാപകനായ ജി ആര്‍ ഗോപിനാഥിന്റെ ബിസിനസ് ജീവിതം ആധാരമാക്കിയാണ് ഒരുങ്ങിയത്. അപര്‍ണ ബാലമുരളി ഈ ചിത്രത്തിലെ നായികാ വേഷത്തിലൂടെ തമിഴില്‍ അരങ്ങേറ്റം കുറിക്കുന്നു. സൂധ കോംഗാരയും ശാലിനി ഉഷ നായരും ചേര്‍ന്നാണ് തിരക്കഥ ഒരുക്കിയിട്ടുള്ളത്. ചിത്രത്തില്‍ പരേഷ് റാവല്‍, ജാക്കി ഷ്‌റോഫ്, മോഹന്‍ ബാബു തുടങ്ങിയ അഭിനേതാക്കളുമുണ്ട്. പിരീഡ്‌സ് ദ എന്‍ഡ് ഓഫ് സെന്റന്‍സ് എന്ന ഡോക്യുമെന്ററി ചിത്രത്തിന്റെ നിര്‍മ്മാണത്തിലൂടെ ഓസ്‌കാര്‍ പുരസ്‌കാരം സ്വന്തമാക്കിയ ഗുനീത് മോംഗയും സൂര്യയുടെ 2ഡി എന്റര്‍ടെയ്‌മെന്റ്‌സും ചേര്‍ന്നാണ് നിര്‍മാണം. ഇരുതി സുട്ര് എന്ന ആദ്യ ചിത്രത്തിലൂടെതന്നെ ശ്രദ്ധേയയായ സംവിധായകയാണ് സുധ കോംഗാര. ജി വി പ്രകാശ് ചിത്രത്തിന് സംഗീതം നല്‍കുന്നു.
Suriya’s Soorarai Pottru streaming from today night on Amazon Prime. The movie directed by Sudha Kongara has Aparna Balamurali as the female lead.