റോഷന്‍ ആന്‍ഡ്രൂസിന്‍റെ (Roshan Andrews) സംവിധാനത്തില്‍ നിവിന്‍ പോളി (Nivin Pauly) മുഖ്യ വേഷത്തിലെത്തുന്ന ‘സാറ്റര്‍ഡേ നൈറ്റ്സ്’ ഫൈനല്‍ മിക്സ് പൂര്‍ത്തിയായി. കായംകുളം കൊച്ചുണ്ണിക്ക് ശേഷം ഇരുവരും ഒന്നിക്കുന്ന ചിത്രം ഫണ്‍ എന്‍റര്‍ടെയ്നര്‍ സ്വഭാവത്തിലുള്ളതാണ്. സെന്‍സറിംഗ് നടപടികള്‍ അവധി ദിനങ്ങള്‍ക്കു ശേഷം പൂര്‍ത്തിയാക്കി ഒക്റ്റോബര്‍ 14ന് ചിത്രം തിയറ്ററുകളിലെത്തിക്കുന്നതിനാണ് ലക്ഷ്യമിടുന്നത്. അജിത്ത് വിനായക ഫിലിംസിന്റെ ബാനറിൽ വിനായക അജിത്താണ് ചിത്രം നിർമിക്കുന്നത്.
നേരത്തോ സെപ്റ്റംബര്‍ 30ന് ചിത്രം തിയറ്ററുകളില്‍ എത്തിക്കുന്നതിനാണ് ശ്രമിച്ചിരുന്നത്. എന്നാല്‍ അന്തിമമായ പോസ്റ്റ് പ്രൊഡക്ഷന്‍ ജോലികള്‍ നീണ്ടുപോകുകയായിരുന്നു. ദുബായ്‌, ബെംഗളൂർ, മൈസൂർ എന്നിവയാണ് പ്രധാന ലൊക്കേഷനുകള്‍. സിജു വിൽസൻ, സൈജു കുറുപ്പ്, അജു വർഗീസ്, സാനിയ ഇയ്യപ്പൻ എന്നിവരും ചിത്രത്തില്‍ പ്രധന വേഷങ്ങളിലുണ്ട്. നവീന്‍ ഭാസ്‍കറാണ് തിരക്കഥ ഒരുക്കുന്നത്. ആർ. ദിവാകരൻ ഛായാഗ്രഹണം നിർവഹിച്ച ചിത്രത്തിനായി ജേക്സ് ബിജോയ് സംഗീതം ഒരുക്കിയിരിക്കുന്നു.