ജിത്തു മാധവൻ രചനയും സംവിധാനവും നിര്‍വഹിച്ച് സൌബിന്‍ ഷാഹിറും നിരവധി പുതുമുഖങ്ങളും മുഖ്യ വേഷത്തിലെത്തുന്ന ‘രോമാഞ്ചം’ തിയറ്ററുകളിലെ വന്‍ വിജയത്തിന് ശേഷം ഒടിടി പ്രദര്‍ശനത്തിലേക്ക് നീങ്ങുകയാണ്. ഏപ്രില്‍ 7ന് ഹോട്ട്‍സ്റ്റാറിലൂടെയാണ് ഒടിടി റിലീസ്. ആഗോള കളക്ഷനിൽ 65 കോടി കളക്ഷന്‍ പിന്നിട്ട ചിത്രം ഇപ്പോഴും പല തിയറ്ററുകളിലും തുടരുന്നുണ്ട്. 2023ല്‍ പുറത്തിറങ്ങി വ്യക്തമായും ബോക്സ് ഓഫിസ് ഹിറ്റ് എന്നു നിര്‍വചിക്കാവുന്ന തരത്തിലേക്കെത്തുന്ന ആദ്യ ചിത്രമാണിത്. നല്ലൊരു ഫണ്‍ എന്‍റര്‍ടെയ്നറായാണ് ചിത്രം വിലയിരുത്തപ്പെടുന്നത്.
കേരളത്തിൽനിന്ന് 42 കോടിയോളമാണ് ചിത്രം കളക്ട് ചെയ്തിട്ടുള്ളത്. ജോൺപോൾ ജോർജ്ജ്, സൌബിൻ ഷാഹിർ ഗിരീഷ് എന്നിവര്‍ ചേര്‍ന്ന് നിര്‍മിക്കുന്ന ചിത്രത്തിന് സനു താഹിർ ഛായാഗ്രഹണവും സുഷിന്‍ ഷ്യാം സംഗീതവും കിരണ്‍ ദാസ് എഡിറ്റിംഗും നിര്‍വഹിച്ചു. അർജുൻ അശോകൻ,ചെമ്പൻ വിനോദ് ജോസ്, അസിം ജമാൽ, സജിൻ ഗോപു, ശ്രീജിത്ത് നായർ എന്നിവരാണ് ചിത്രത്തിലെ മറ്റ് പ്രധാന വേഷങ്ങളില്‍ എത്തുന്നത്.