മണിരത്നത്തിന്‍റെ (Maniratnam) സ്വപ്ന ചിത്രം ‘പൊന്നിയിന്‍ സെൽവന്‍’ (Ponniyin Selvan) ആദ്യദിനത്തില്‍ ആഗോള ബോക്സ്ഓഫിസില്‍ നിന്ന് നേടിയത് 80 കോടി രൂപയെന്ന് വ്യക്തമാക്കി നിര്‍മാതാക്കളായ ലൈക്ക പ്രോഡക്ഷന്‍സ്. തമിഴകത്തു നിന്നും ചിത്രം ആദ്യ ദിനത്തില്‍ 30 കോടിക്ക് അടുത്ത് കളക്റ്റ് ചെയ്തെന്നാണ് ട്രേഡ് അനലിസ്റ്റുകള്‍ വിലയിരുത്തുന്നത്. യുഎസില്‍ ഒരു തമിഴ് ചിത്രം നേടുന്ന ഏറ്റവും ഉയര്‍ന്ന ആദ്യദിന കളക്ഷനാണ് പിഎസ്-1 നേടിയത്. കേരളത്തില്‍ ആദ്യ ദിനത്തില്‍ 3.3-3.5 കോടി കളക്ഷന്‍ സ്വന്തമാക്കിയ ചിത്രം രണ്ടാം ദിനത്തില്‍ കളക്ഷന്‍ ഉയര്‍ത്തിയെന്നാണ് വിവരം.
കൽക്കി കൃഷ്ണമൂർത്തി എഴുതിയ അതേ പേരിലുള്ള ചരിത്രനോവലിനെ അടിസ്ഥാനമാക്കി,ഒരുക്കിയ ചിത്രത്തില്‍, വിക്രം (Vikram), കാർത്തി (Karthi), ജയം രവി (Jayam Ravi), ഐശ്വര്യ റായ് (Aiswarya Rai), ത്രിഷ (Trisha), ഐശ്വര്യ ലക്ഷ്മി, ശരത് കുമാർ, പ്രകാശ് രാജ്, കിഷോർ, ജയറാം, റഹ്മാൻ, ലാൽ, അശ്വിൻ കകുമാനു തുടങ്ങിയ അഭിനേതാക്കൾ അണിനിരക്കുന്നു. പോണ്ടിച്ചേരിയിലും ഹൈദരാബാദ് രാമോജി റാവു സ്റ്റുഡിയോയിലുമായാണ് ഈ മള്‍ട്ടിസ്റ്റാര്‍ ചിത്രത്തിന്‍റെ ഷൂട്ടിംഗ് നടന്നത്.
എ. ആര്‍. റഹ്മാന്‍ നല്‍കിയ സംഗീതവും കൈയടി നേടുന്നുണ്ട്. തമിഴിനു പുറമേ മലയാളം, കന്നഡ, ഹിന്ദി, തെലുുങ്ക് ഭാഷകളിലും ചിത്രം പുറത്തിറങ്ങി. ചിത്രത്തിന്‍റെ രണ്ടാം ഭാഗം അടുത്ത വര്‍ഷം പുറത്തിറക്കുമെന്നാണ് വിവരം. ഗോകുലം മൂവീസാണ് പൊന്നിയിന്‍ സെല്‍വന്‍ കേരളത്തില്‍ പ്രദര്‍ശനത്തിനെത്തിക്കുന്നത്.