ലിജോ ജോസ് പല്ലിശേരിയുടെ (Lijo Jose Pallissery) സംവിധാനത്തില്‍ മെഗാസ്റ്റാര്‍ മമ്മൂട്ടി (Mammootty) വേറിട്ട കഥാപാത്ര സൃഷ്ടിയില്‍ തിളങ്ങുന്ന ‘നന്‍പകല്‍ നേരത്ത് മയക്കം’ (Nanpakal Nerathu Mayakkam) ഒടിടി പ്രദര്‍ശനത്തിന് എത്തി. നെറ്റ്ഫ്ളിക്സിലാണ് ചിത്രം ലഭ്യമാകുക. ആഗോള തലത്തില്‍ ചിത്രം തിയറ്ററുകളില്‍ നിന്ന് കരസ്ഥമാക്കിയത് 10 കോടി രൂപയ്ക്കടുത്താണ്. മൂന്നു കോടിയോളം മുതല്‍ മുടക്കിലാണ് ചിത്രം നിര്‍മിച്ചതെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.
കേരളത്തിന്‍റെ അന്താരാഷ്ട്ര ചലച്ചിത്രോല്‍സവത്തിന്‍റെ മത്സര വിഭാഗത്തില്‍ പ്രദര്‍ശിപ്പിച്ച ചിത്രം പ്രേക്ഷക പ്രീതി നേടിയ ചിത്രത്തിനുള്ള പുരസ്കാരം നേടിയിരുന്നു. മമ്മൂട്ടി കമ്പനി ആദ്യമായി നിര്‍മാണം ഏറ്റെടുത്ത ഈ ചിത്രത്തിലെ ഒരു പ്രധാന വേഷത്തില്‍ തമിഴ് നടി രമ്യ പാണ്ഡ്യന്‍ (Ramya Pandian) ആണ് എത്തുന്നത്. അശോകനാണ് മറ്റൊരു പ്രധാന വേഷം ചെയ്യുന്നത്. മലയാളത്തിലെയും തമിഴിലെയും താരങ്ങള്‍ ചിത്രത്തില്‍ അഭിനേതാക്കളായി എത്തുന്നു. ലിജോ ജോസ് പെല്ലിശ്ശേരിയുടെ കഥക്ക് തിരക്കഥയും സംഭാഷണവും ഒരുക്കിയത് എസ് ഹരീഷാണ്. മുന്‍ ചിത്രങ്ങളിലെ പോലെ ഫാന്‍റസി കൂടി കൂട്ടിയിണക്കിയാണ് എല്‍ജെപി ഈ ചിത്രം ഒരുക്കിയത്.