ലിജോ ജോസ് പല്ലിശേരിയുടെ (Lijo Jose Pallissery) സംവിധാനത്തില്‍ മെഗാസ്റ്റാര്‍ മമ്മൂട്ടി (Mammootty) ആദ്യമായി എത്തുന്ന ചിത്രം ‘നന്‍പകല്‍ നേരത്ത് മയക്കം’ (Nanpakal Nerathu Mayakkam) ആദ്യ പ്രദര്‍ശനത്തിന് ഒരുങ്ങുന്നു. കേരളത്തിന്‍റെ അന്താരാഷ്ട്ര ചലച്ചിത്രോല്‍സവത്തിന്‍റെ മത്സര വിഭാഗത്തിലേക്ക് തിരഞ്ഞെടുക്കപ്പെട്ടിട്ടുള്ള ചിത്രം ഡിസംബര്‍ 12ന് ഉച്ചയ്ക്ക് 3.30ന് തിരുവനന്തപുരം ടാഗോര്‍ തിയറ്ററിലാണ് ആദ്യ പ്രദര്‍ശനം നടത്തുന്നത്. 13ന് ഉച്ചയ്ക്ക് 12 മണിക്ക് ഏരീസ് പ്ലക്സിലും 14ന് രാവിലെ 9.30ന് അജന്ത തിയറ്ററിലും ഐഎഫ്എഫ്കെ-യുടെ ഭാഗമായി ചിത്രം പ്രദര്‍ശിപ്പിക്കും.
വളരേ വ്യത്യസ്ത തലത്തിലുള്ള അവതരണവും കഥാപാത്ര സൃഷ്ടിയുമാണ് ചിത്രത്തിന്‍റേതെന്നാണ് സൂചന. മമ്മൂട്ടി കമ്പനി ആദ്യമായി നിര്‍മാണം ഏറ്റെടുത്ത ഈ ചിത്രം ഐഎഫ്എഫ്കെ പ്രദര്‍ശനങ്ങള്‍ക്കു പിന്നാലെ തിയറ്ററുകളിലേക്ക് എത്തും. ചിത്രത്തിലെ ഒരു പ്രധാന വേഷത്തില്‍ തമിഴ് നടി രമ്യ പാണ്ഡ്യന്‍ (Ramya Pandian) ആണ് എത്തുന്നത്. അശോകനാണ് മറ്റൊരു പ്രധാന വേഷം ചെയ്യുന്നത്. മലയാളത്തിലെയും തമിഴിലെയും താരങ്ങള്‍ ചിത്രത്തില്‍ അഭിനേതാക്കളായി എത്തുന്നു. ലിജോ ജോസ് പെല്ലിശ്ശേരിയുടെ കഥക്ക് തിരക്കഥയും സംഭാഷണവും ഒരുക്കിയത് എസ് ഹരീഷാണ്.