നെറ്റ്ഫ്ളിക്സില്‍ പുതിയ സ്ട്രീമിംഗ് റെക്കോഡുകള്‍ തീര്‍ത്ത് മുന്നേറുകയാണ് മലയാളത്തിന്‍റെ സൂപ്പര്‍ഹീറോ ചിത്രം. ബേസില്‍ ജോസഫ് സംവിധാനം ചെയ്ത് ടോവിനോ തോമസ് മുഖ്യ വേഷത്തില്‍ എത്തിയ ചിത്രം ഡിസംബര്‍ 27 മുതല്‍ ജനുവരി 2 വരെയുള്ള ഒരാഴ്ചയില്‍ 11.5 മില്യണ്‍ സ്ട്രീമിംഗ് മണിക്കൂറുകളാണ് സ്വന്തമാക്കിയത്. ഒരു ഇന്ത്യന്‍ ചിത്രം ഒരാഴ്ച കാലയളവില്‍ നെറ്റ്ഫ്ള്ക്സില്‍ സ്വന്തമാക്കുന്ന ഏറ്റവും ഉയര്‍ന്ന നേട്ടമാണിത്. കഴിഞ്ഞ വാരത്തില്‍ ആഗോള തലത്തില്‍ നോണ്‍-ഇംഗ്ലീഷ് ചിത്രങ്ങളുടെ വിഭാഗത്തില്‍ മൂന്നാം സ്ഥാനം മിന്നല്‍ മുരളിക്കാണെന്നും നെറ്റ്ഫ്ളിക്സ് പുറത്തുവിട്ട ഡാറ്റ വ്യക്തമാക്കുന്നു. 30 രാഷ്ട്രങ്ങളിലെ ടോപ് 10 ലിസ്റ്റില്‍ മിന്നല്‍ മുരളി ഇടം നേടിയിട്ടുണ്ട്.
ഡിസംബര്‍ 20 മുതല്‍ 26 വരെയുള്ള ആഴ്ചയില്‍ നോണ്‍ ഇംഗ്ലീഷ് ചിത്രങ്ങളുടെ വിഭാഗത്തില്‍ നാലാം സ്ഥാനം നേടാന്‍ ചിത്രത്തിനായിരുന്നു. ടോവിനോ തോമസും ഗുരു സോമസുന്ദരവും മുഖ്യ വേഷങ്ങളിലെത്തിയ ചിത്രം 24നാണ് നെറ്റ്ഫ്ളിക്സില്‍ എത്തിയത്. മലയാളത്തിനു പുറമേ ഹിന്ദി, തമിഴ്, തെലുങ്ക്, കന്നഡ ഭാഷകളിലായി പുറത്തിറങ്ങിയ ചിത്രത്തിന് ഇന്ത്യയിലെ മറ്റുഭാഷാ പ്രേക്ഷകരില്‍ നിന്നും മികച്ച സ്വീകാര്യത ലഭിക്കുന്നു. ചൈനയിലെ കുട്ടികള്‍ മിന്നല്‍ മുരളി ആരവങ്ങളോടെ ആസ്വദിക്കുന്ന വിഡിയോ സംവിധായകന്‍ ബേസില്‍ ജോസഫ് കഴിഞ്ഞ ദിവസം പങ്കുവെച്ചിരുന്നു.
Minnal Murali trending top 3 worldwide at Netflix’s non-English top 10 list. The Basil Joseph directorial has Tovino Thomas and Guru Somasundaram in lead roles. Getting record streaming hours for an Indian film.