ലോകമെമ്പാടുമുള്ള ഇന്ത്യന്‍ സിനിമാ പ്രേക്ഷകരും രജനീകാന്ത് ആരാധകരും ആകാംക്ഷയോടെ കാത്തിരിക്കുന്ന സയന്‍സ് ഫിക്ഷന്‍ 2.0 കേരളത്തില്‍ റെക്കോഡ് റിലീസായി തിയറ്ററുകളിലെത്തി. കേരളത്തില്‍ വമ്പന്‍ റിലീസ് ആണ് ആലോചിക്കുന്നതെന്നും 450 തീയേറ്ററുകളില്‍ ചിത്രം എത്തിക്കുമെന്നും വിതരണാവകാശം സ്വന്തമാക്കിയ ടോമിച്ചന്‍ മുളകുപാടം വ്യക്തമാക്കിയിട്ടുണ്ട്. മിക്ക തിയറ്ററുകളിലും ആദ്യ ദിനത്തില്‍ ഏഴ് പ്രദര്‍ശനങ്ങള്‍ ഉറപ്പാക്കാനാണ് ശ്രമിക്കുന്നത്. ഓണ്‍ലൈന്‍ ബുക്കിംഗ് ആരംഭിച്ചു കഴിഞ്ഞു. പുലര്‍ച്ചെ നാലിന് തന്നെ പലയിടങ്ങളിലും ഷോ ആരംഭിക്കുമെന്നുമാണ് സൂചന.
സെന്‍സറിംഗ് പൂര്‍ത്തിയായ ചിത്രത്തിന് യു/ എ സര്‍ട്ടിഫിക്കറ്റാണ് ലഭിച്ചിട്ടുള്ളത്. നവംബര്‍ 29ന് തിയറ്ററുകളിലെത്തുകയാണ്. രണ്ട് മണിക്കൂര്‍ 29 മിനുറ്റാണ് ചിത്രത്തിന്റെ ദൈര്‍ഘ്യം. ശങ്കര്‍ സംവിധാനം ചെയ്യുന്ന ചിത്രം 3ഡിയിലാണ് എത്തുന്നത്. പോസ്റ്റ് പ്രൊഡക്ഷനിലെ സാങ്കേതിക തികവിന് സമയമെടുത്തിനാല്‍ ഒരു വര്‍ഷത്തിലേറെയാണ് റിലീസ് നീണ്ടു പോയിട്ടുള്ളത്. കഴിഞ്ഞ വര്‍ഷം ദീപാവലിക്ക് പുറത്തിറക്കാന്‍ ലക്ഷ്യമിട്ടിരുന്ന ചിത്രമാണിത്.
എ ആര്‍ റഹ്മാന്‍ സംഗീതം നല്‍കുന്ന ചിത്രത്തിന്റെ ശബ്ദസന്നിവേശം റസൂല്‍ പൂക്കുട്ടിയാണ് നിര്‍വഹിക്കുന്നത്. ലോകമെമ്പാടുമുള്ള 10,000ഓളം സ്‌ക്രീനുകളിലായിരിക്കും ചിത്രം പ്രദര്‍ശനത്തിനെത്തുക. അക്ഷയ്കുമാര്‍ , എമി ജാക്‌സണ്‍ എന്നിവരും ചിത്രത്തില്‍ പ്രധാന വേഷങ്ങളിലുണ്ട്. തമിഴ്, തെലുങ്ക്, ഹിന്ദി ഭാഷകളിലെ പതിപ്പ് ഒരുമിച്ച് റിലീസ് ചെയ്യും. വിദേശ ഭാഷകളിലെ പതിപ്പുകളുടെ റിലീസ് പിന്നീടായിരിക്കും. ചിത്രം രജനികാന്ത് ഇരട്ട വേഷത്തിലെത്തിയ എന്തിരന്റെ രണ്ടാം ഭാഗമാണ്.
