ഷൂട്ടിംഗ് ഘട്ടത്തില്‍ നിരവധി വിവാദങ്ങളും തടസങ്ങളും നേരിട്ടതിലൂടെ വാര്‍ത്താപ്രാധാന്യം നേടിയ ‘വെയില്‍’ എന്ന ചിത്രത്തിന്‍റെ സെന്‍സറിംഗ്ഷ പൂര്‍ത്തിയായി. ഗുഡ്‌വില്‍ എന്റര്‍ടെയ്ന്‍മെന്റ്‌സിന്റെ ബാനറില്‍ ജോബി ജോര്‍ജ് നിര്‍മിച്ച ചിത്രം ശരത് മേനോനാണ് സംവിധാനം ചെയ്തത്. ഷെയ്ന്‍ നിഗം മുഖ്യ വേഷത്തില്‍ എത്തുന്ന ചിത്രത്തിന് ക്ലീന്‍ യു സര്‍ട്ടിഫിക്കറ്റാണ് ലഭിച്ചിട്ടുള്ളത്. തിയറ്ററുകളില്‍ തന്നെ ആദ്യം റിലീസ് നടത്തുന്നതിനാണ് അണിയറ പ്രവര്‍ത്തകരുടെ തീരുമാനം.
ഷെയ്നിന്റെ ഡേറ്റ് ഉള്‍പ്പടെയുള്ള പ്രശ്‌നങ്ങളെ തുടര്‍ന്ന് ഷൂട്ടിംഗ് ആദ്യ ഘട്ടത്തില്‍ തന്നെ ഏറെ നീണ്ടു പോയിരുന്നു. പ്രശ്‌നങ്ങള്‍ അവസാനിച്ച്‌ ഷെയ്നിന്റെ വിലക്കു നീക്കി ഷൂട്ടിംഗ് ആരംഭിച്ചതിനു പിന്നാലെയാണ് കൊറൊണ വൈറസ് ബാധയുടെ പശ്ചാത്തലത്തില്‍ ഷൂട്ടിംഗ് നിര്‍ത്തേണ്ടി വന്നത്. ലോക്ക്ഡൗണ്‍ നിയന്ത്രണങ്ങള്‍ നീങ്ങിയതോടെ പിന്നീട് ഷൂട്ടിംഗ് പൂര്‍ത്തിയാക്കുകയായിരുന്നു. ഷാസ് മുഹമ്മദ് ക്യാമറയും പ്രവീണ്‍ പ്രഭാകര്‍ എഡിറ്റിംഗും നിര്‍വഹിക്കുന്നു. തമിഴിലെ ഗായകനായ പ്രദീപ് കുമാറാണ് വെയിലിന് സംഗീതം നല്‍കുന്നത്. ലിജോ ജോസ് പല്ലിശേരിയുടെ അസോസിയേറ്റായി പ്രവര്‍ത്തിച്ചിട്ടുള്ളയാളാണ് ശരത് മേനോന്‍. അങ്കമാലി ഡയറീസ്, ഈമയൗ തുടങ്ങിയ ചിത്രങ്ങളില്‍ പ്രവര്‍ത്തിച്ചിട്ടുണ്ട്. ശരത് തന്നെയാണ് വെയിലിന്റെ രചനയും നിര്‍വഹിച്ചിരിക്കുന്നത്. സുരാജ് വെഞ്ഞാറമ്മൂട്, ഷൈന്‍ ടോം ചാക്കോ എന്നിവരും പ്രധാന വേഷങ്ങളിലുണ്ട്.
Shane Nigam starter Veyil censored with clean U. Debutant Sarath Menon directing the movie which has Suraj Venjarammood, Shine Tom Chacko in pivotal roles.