ദളപതി വിജയ് നായകനാകുന്ന മാസ്റ്റര്‍ ഹിന്ദിയിലും വന്‍ റിലീസിന് തയാറെടുക്കുന്നു. ലോകേഷ് കനകരാജ് സംവിധാനം ചെയ്ത ചിത്രം ‘വിജയ് ദ മാസ്റ്റര്‍’ എന്ന പേരിലാണ് ഹിന്ദിയില്‍ എത്തുക. തമിഴിനൊപ്പം ഹിന്ദി പതിപ്പും തിയറ്ററുകളില്‍ എത്തിക്കുന്ന ആദ്യ വിജയ് ചിത്രമാകുകയാണ് മാസ്റ്റര്‍. സെന്‍സറിംഗ് പൂര്‍ത്തിയായ ചിത്രത്തിന് യു/എ സര്‍ട്ടിഫിക്കറ്റാണ് ലഭിച്ചിട്ടുള്ളത്. പൊങ്കല്‍ സീസണില്‍ തിയറ്ററില്‍ തന്നെ റിലീസ് ചെയ്യുന്നതിനാണ് ശ്രമിക്കുന്നതെന്ന് അണിയറ പ്രവര്‍ത്തകര്‍ വ്യക്തമാക്കിയിട്ടുണ്ട്. ലഭിക്കുന്ന വിവരങ്ങള്‍ പ്രകാരം ജനുവരി 13ന് ആഗോള റിലീസായി ചിത്രം എത്തിക്കുന്നതിനാണ് ശ്രമിക്കുന്നത്. വിദേശ വിതരണക്കാര്‍ ഉള്‍പ്പടെ ഉള്ളവരോട് ഈ തിയതിയാണ് നല്‍കിയിട്ടുള്ളത്. ബി4യു മോഷന്‍ പിക്ചേര്‍സ് ആണ് ഹിന്ദി പതിപ്പ് വിതരണത്തിന് എത്തിക്കുന്നത്. മാസ്റ്റര്‍ കേരളത്തില്‍ തെക്കന്‍ ജില്ലകളില്‍ മാജിക് ഫ്രെയിംസും വടക്കന്‍ ജില്ലകളില്‍ ഐഎഎംപി ഫിലിംസും വിതരണത്തിന് എത്തിക്കുന്നു.
വിജയ് സേതുപതി വില്ലന്‍ വേഷത്തില്‍ എത്തുന്നു എന്നതും സവിശേഷതയാണ്. ഏപ്രിലില്‍ റിലീസ് ചെയ്യാനിരുന്ന ചിത്രം കൊറോണ മൂലം വൈകുകയായിരുന്നു. മാളവിക മോഹന്‍ നായികയാകുന്ന ചിത്രത്തില്‍ ഒരു ആര്‍ട്‌സ്/സയന്‍സ് കോളെജിലെ പ്രൊഫസറായ ജോണ്‍ ദുരൈരാജ് അഥവാ ജെഡി ആയാണ് വിജയ് എത്തുന്നത്. സ്റ്റുഡന്റ്‌സ് അസോസിയേഷന്‍ ഡീന്‍ കൂടിയാണ് ഈ കഥാപാത്രമെന്നാണ് സൂചന. ശന്തനു, ഗൗരി കിഷാന്‍ തുടങ്ങിയവരും പ്രധാന വേഷങ്ങളിലുണ്ട്. സേവ്യര്‍ ബ്രിട്ടോ നിര്‍മിക്കുന്ന ചിത്രത്തിന്‍റെ ഓഡിയോ ലോഞ്ച് മാര്‍ച്ച്‌ 15ന് നടന്നിരുന്നു. അനിരുദ്ധിന്‍റേതാണ് സംഗീതം. ഒരു യഥാര്‍ത്ഥ സംഭവത്തില്‍ നിന്നും വ്യക്തിയില്‍ നിന്നുമാണ് മാസ്റ്ററിന്റെ പ്രമേയം രൂപപ്പെട്ടത്.
Thalapathy Vijay starrer Master’s Hindi version titled as ‘Vijay the Master’. The Lokesh Kanagaraj directorial has Vijay Sathupathi as villain. Eyeing Pongal release.