മമ്മൂട്ടിയുടെ തെലുങ്കു ചിത്രം യാത്രയുടെ ടീസർ കാണാം

രണ്ടു പതിറ്റാണ്ടുകള്‍ക്ക് ശേഷം മമ്മൂട്ടി തെലുങ്കില്‍ തിരിച്ചുവരവ് നടത്തുന്ന യാത്രയുടെ ടീസർ പുറത്തിറങ്ങി. അന്തരിച്ച ആന്ധ്രാ മുഖ്യമന്ത്രി വൈ എസ് രാജശേഖര റെഡ്ഡിയുടെ ജീവിതകഥയെ ആസ്പദമാക്കി മഹി വി രാഘവ് സംവിധാനം ചെയ്യുന്ന യാത്രയുടെ ആദ്യ ടീസര്‍ വൈഎസ്ആറിന്റെ ജന്‍മദിനത്തോട് അനുബന്ധിച്ചാണ് പുറത്തിറക്കിയത്.

70 എംഎം എന്റര്‍ടെയ്ന്‍മെന്റ്‌സ് നിര്‍മിക്കുന്ന ചിത്രത്തില്‍ മമ്മൂട്ടി വൈഎസ്ആറായി എത്തുമ്പോള്‍ ഒരു പ്രധാന വേഷത്തില്‍ സൂര്യയും എത്തിയേക്കും. മമ്മൂട്ടിയുടെ മകന്റെ വേഷത്തില്‍ ഒരല്‍പ്പം നീണ്ട അതിഥി വേഷമാണ് സൂര്യക്കെന്നാണ് സൂചന.
നേരത്തേ മേയില്‍ ചിത്രത്തിന്റെ ഷൂട്ടിംഗ് തുടങ്ങാനാണ് പദ്ധതിയിട്ടിരുന്നത്. ആറു മാസങ്ങള്‍ കൊണ്ട് ഷൂട്ടിംഗും പോസ്റ്റ് പ്രൊഡക്ഷനും പൂര്‍ത്തിയാക്കി. അടുത്ത വര്‍ഷം ആദ്യത്തില്‍ ചിത്രം തിയറ്ററുകളിലെത്തിക്കാനാണ് ശ്രമിക്കുന്നത്. 1999 മുതല്‍ 2004 വരെയുള്ള കാലഘട്ടത്തിലെ വൈഎസ്ആറിന്റെ ജീവിതമാണ് ചിത്രം പറയുന്നത്. 2004ല്‍ കോണ്‍ഗ്രസിനെ അധികാരത്തില്‍ എത്തിക്കുന്നതില്‍ പ്രധാന പങ്കുവഹിച്ച വൈഎസ്ആറിന്റെ മൂന്നു മാസം നീണ്ട പദയാത്രയാണ് ചിത്രത്തിന്റെ പ്രധാന ഫോക്കസ്.
വൈഎസ് ആറിന്റെ ഭാര്യ വേഷത്തില്‍ പ്രമുഖ നര്‍ത്തകി ആശ്രിത വൈമുഗതി ആണ് എത്തുക. ബാഹുബലിയില്‍ അനുഷ്‌കയുടെ ദേവസൂര്യ എന്ന കഥാപാത്രത്തിന്റെ ചേട്ടത്തിയമ്മയായി ആശ്രിത എത്തിയിട്ടുണ്ട്. ഭൂമിക ചൗളയാണ് വൈഎസ്ആറിന്റെ മകളുടെ വേഷത്തില്‍ എത്തുന്നത്. വൈഎസ്ആറിന്റെ
മന്ത്രിസഭയിലെ അംഗമായിരുന്ന സബിത ഇന്ദ്ര റെഡ്ഡിയായി സുഹാസിനിയും ചിത്രത്തിലെത്തുന്നു.