മമ്മൂട്ടി ചിത്രം ‘ദി പ്രീസ്റ്റ്’ ലോക്ക് ഡൌണിനു ശേഷം തിയറ്ററുകളില്‍ പ്രേക്ഷകരെ എത്തിക്കുന്നതിലും കേരളത്തിലെ തിയറ്ററുകളെ പുനരുജ്ജീവിപ്പിക്കുന്നതിലും ഏറ്റവും വലിയ പങ്കുവഹിച്ച ചിത്രമാണ്. അഞ്ചാം ആഴ്ചയിലേക്ക് കടക്കുമ്പോഴും ചിത്രം 50ല്‍ അധികം തിയറ്ററുകളില്‍ പ്രദര്‍ശനത്തിലുണ്ട്. നവാഗതനായ ജോഫിന്‍ ചാക്കോയുടെ സംവിധാനത്തില്‍ ഒരുങ്ങിയ പ്രീസ്റ്റ് ടോട്ടല്‍ ബിസിനസില്‍ 50 കോടിക്ക് മുകളില്‍ സ്വന്തമാക്കിയിട്ടുണ്ടെന്നാണ് വിവരം. ആന്റോ ജോസഫ് നിര്‍മാതാവായ ചിത്രം റിലീസിന് മുമ്പ് തന്നെ വിവിധ ബിസിനസുകളിലൂടെ മുടക്ക് മുതല്‍ തിരിച്ചു പിടിച്ചിരുന്നു. ഇപ്പോള്‍ ചിത്രത്തിന്‍റെ ഒടിടി റിലീസ് പ്രഖ്യാപിച്ചിരിക്കുകയാണ്.
ഏപ്രില്‍ 14 വിഷുദിനത്തില്‍ പ്രീസ്റ്റ് ആമസോണ്‍ പ്രൈം പ്ലാറ്റ്ഫോമിലെത്തും. ഏകദേശം 7 കോടി രൂപയ്ക്കാണ് ഒടിടി അവകാശം ആമസോണ്‍ പ്രൈമിന് കൈമാറിയതെന്നാണ് വിവരം. സൌദി അറേബ്യയില്‍ ആദ്യമായി 1 കോടി രൂപ കളക്ഷന്‍ നേടുന്ന മലയാള ചിത്രം, എപെക് രാഷ്ട്രങ്ങളില്‍ 2 കോടി നേടിയ മലയാള ചിത്രം, ഓസ്ട്രേലിയ, ന്യൂസിലാന്‍ഡ് തുടങ്ങിയ വിപണികളില്‍ ഏറ്റവും കൂടുതല്‍ കളക്ഷന്‍ സ്വന്തമാക്കിയ മലയാള ചിത്രം തുടങ്ങിയ നേട്ടങ്ങള്‍ ഇതിനകം പ്രീസ്റ്റ് നേടിയിട്ടുണ്ടെന്നാണ് ട്രേഡ് അനലിസ്റ്റുകള്‍ വ്യക്തമാക്കുന്നത്.
മഞ്ജു വാര്യര്‍ ആദ്യമായി മമ്മൂട്ടിക്കൊപ്പം അഭിനയിക്കുന്നു എന്ന സവിശേഷതയും പ്രീസ്റ്റിന് ഉണ്ടായിരുന്നു. നിഖില വിമല്‍, സാനിയ ഇയപ്പന്‍, ബേബി മോണിക്ക, ജഗദീഷ്, രമേശ് പിഷാരടി,അമേയ മാത്യു, വെങ്കിടേഷ്, ടോണി ലൂക്ക് എന്നിവരടങ്ങുന്ന വന്‍ താരനിര ചിത്രത്തിലുണ്ട്. ജോഫിന്റെ തന്നെ കഥയ്ക്ക് തിരക്കഥയും സംഭാഷണങ്ങളും ഒരുക്കിയത് ദീപു പ്രദീപും ശ്യാം മോഹനും ചേര്‍ന്നാണ്. അഖില്‍ ജോര്‍ജ് ക്യാമറയും ഷമീര്‍ മുഹമ്മദ് എഡിറ്റിംഗും നിര്‍വഹിച്ചു. ആന്റോ ജോസഫ്, ബി ഉണ്ണികൃഷ്ണന്‍, വി എന്‍ ബാബു എന്നിവര്‍ സംയുക്തമായാണ് ചിത്രം നിര്‍മിച്ചത്.
Mammootty starrer ‘The Priest’ streaming on Amazon prime from April 14th. The Joffin Chacko directorial has Manju Warrier as the female lead.