മോഹന്‍ലാല്‍ മുഖ്യ വേഷത്തിലെത്തുന്ന ‘നെയ്യാറ്റിന്‍കര ഗോപന്‍റെ ആറാട്ട്’ എന്ന ചിത്രത്തിന്‍റെ ട്രെയിലര്‍ ഫെബ്രുവരി 4 വെള്ളിയാഴ്ച വൈകിട്ട് 5.00 മണിക്ക് പുറത്തിറക്കും. നേരത്തേ പുതുവര്‍ഷ ദിനത്തില്‍ ട്രെയിലര്‍ റിലീസ് പ്രഖ്യാപിച്ചിരുന്നെങ്കിലും ചിത്രത്തിന്‍റെ റിലീസ് വൈകുമെന്ന കണക്കുകൂട്ടലില്‍ മാറ്റിവെക്കുകയായിരുന്നു. ചിത്രത്തിന്‍റെ പുതുക്കിയ റിലീസ് തീയതിയും വെള്ളിയാഴ്ച പുറത്തിറങ്ങുന്ന ട്രെയിലറിനൊപ്പം പുറത്തുവിടുമെന്നാണ് വിവരം. നേരത്തേ ഫെബ്രുവരി 10നാണ് റിലീസ് നിശ്ചയിച്ചിരുന്നത്.
ഉദയകൃഷ്‍ണയുടെ തിരക്കഥയില്‍ ബി ഉണ്ണികൃഷ്ണന്‍ സംവിധാനം ചെയ്ത ചിത്രം മാസ് എന്‍റര്‍ടെയ്നര്‍ സ്വഭാവത്തില്‍ ഉള്ളതാണെന്ന് അണിയറ പ്രവര്‍ത്തകര്‍ പറയുന്നു. സെന്‍സറിംഗ് പൂര്‍ത്തിയായ ചിത്രം ക്ലീന്‍ യു സര്‍ട്ടിഫിക്കറ്റാണ് നേടിയിട്ടുള്ളത്. കെജിഎഫ് ചാപ്റ്റര്‍ വണ്ണിലെ വില്ലന്‍ രാമചന്ദ്ര രാജുവാണ് ഈ ചിത്രത്തില്‍ വില്ലനായി എത്തുന്നത്. അരോമ മോഹന്‍ ആണ് ചിത്രത്തിന്‍റെ നിര്‍മാതാവ്.
ശ്രദ്ധ ശ്രീനാഥ് നായികയാകുന്ന ചിത്രത്തില്‍ നെടുമുടി വേണു, സായ്കുമാര്‍, വിജയരാഘവന്‍, സിദ്ദിഖ്, ജോണി ആന്‍റണി, ഇന്ദ്രന്‍സ്, ഷീല, സ്വാസിക, രചന നാരയണന്‍കുട്ടി, മാളവിക തുടങ്ങിയവരും പ്രധാന വേഷങ്ങളില്‍ എത്തുന്നു. ജോമോന്‍ ടി ജോണ്‍ ക്യാമറയും ഷമീര്‍ മുഹമ്മദ് എഡിറ്റിംഗും നിര്‍വഹിക്കും. രാഹുല്‍ രാജിന്‍റെതാണ് സംഗീതം. എ.ആര്‍ റഹ്മാന്‍ ഈ ചിത്രത്തില്‍ റഹ്മാനായി തന്നെ എത്തുന്നുണ്ട് എന്നതും സവിശേഷതയാണ്.
Mohanlal starrer ‘Neyyatinkara Gopante AAraattu’ aka ‘Aaraattu’s trailer will release on Feb 4th. The B Unnikrishnan directorial will release soon.